കാസര്‍ഗോഡ്: ഡിസിസി വൈസ്പ്രcസിഡന്റ് സ്ഥാനം രാജിവെച്ചതായി മുന്‍ ഈസ്റ്റ് എളേരി പഞ്ചായത്ത് പ്രസിഡന്റ് ജയിംസ് പന്തമ്മാക്കല്‍ പത്രസമ്മേളനത്തില്‍ അറിയിച്ചു. സാധാരണ പ്രവര്‍ത്തകനായി പാര്‍ട്ടിയില്‍ തുടരാനും നേതൃത്വത്തിന്റെ തെറ്റായ സമീപനങ്ങളെ തുറന്നെതിര്‍ക്കാനുമാണ് തീരുമാനം. തദ്ദേശ തെരഞ്ഞെടുപ്പില്‍ ഈസ്റ്റ് എളേരി പഞ്ചായത്തില്‍ നാലു സീറ്റുകള്‍ ആവശ്യപ്പെട്ടെങ്കിലും ഷേര്‍ളി ചീങ്കല്ലേല്‍ മത്സരിക്കുന്ന മുനയംകുന്ന് വാര്‍ഡ് മാത്രമാണ് ലഭിച്ചത്. അവിടെയാണെങ്കില്‍ വിമതസ്ഥാനാര്‍ഥിയെയും നിര്‍ത്തിയിട്ടുണ്ട്. ജെസി ടോമിന് സീറ്റ് നല്‍കണമെന്നും പാര്‍ട്ടിവിരുദ്ധ പ്രവര്‍ത്തനം നടത്തിയ ജോസഫ് മുത്തോലിയെ മത്സരിപ്പിക്കരുതെന്നുമുള്ള ആവശ്യങ്ങള്‍ നിരാകരിക്കപ്പെട്ടു. ചിറ്റാരിക്കാല്‍ സൗത്ത് വാര്‍ഡില്‍ സ്വതന്ത്രയായി മത്സരിക്കുന്ന ജെസിയെ പിന്തുണയ്ക്കുമെന്നും ജയിംസ് പറഞ്ഞു.
ഡിസിസി പ്രസിഡന്റ് പി.കെ.ഫൈസലിനെതിരെ ഗുരുതരമായ ആരോപണങ്ങളാണ് ജയിംസ് ഉന്നയിച്ചത്. ജയിക്കുന്ന സീറ്റുകളും പാര്‍ട്ടി ഭാരവാഹിത്വവും പണം വാങ്ങിയാണ് ഫൈസല്‍ ഓരോരുത്തര്‍ക്കും അനുവദിച്ചിരിക്കുന്നത്. ഡിസിസി ഓഫീസില്‍ നടന്ന അടിവിവാദം കെപിസിസി വൈസ്പ്രസിഡന്റിന്റെ സാന്നിധ്യത്തില്‍ തന്നെ മനഃപൂര്‍വം താറടിച്ചുകാണിക്കാനും അതുവഴി തനിക്കെതിരെ അച്ചടക്കനടപടി സ്വീകരിക്കാനും ഫൈസല്‍ ആസൂത്രണം ചെയ്ത നാടകമാണെന്നും ജയിംസ് ആരോപിച്ചു.
About the Author
