കാസർഗോഡ് : ഭൂമിയെ സ്വര്‍ഗമാക്കാമെന്ന മുദ്രാവാക്യവുമായി തളങ്കര ഗവ. മുസ്ലിം ഹൈസ്‌ക്കൂള്‍ ’75 മേറ്റ്‌സിന്റെ ‘മരം ഒരു വരം’ മൂന്നാമത് വനവല്‍ക്കരണ പദ്ധതിക്ക് തുടക്കമായി. ജുലായ് ഒന്നു മുതല്‍ ഏഴുവരെ കാസർഗോഡിന്റെ വിവിധ ഭാഗങ്ങളില്‍ 500ഓളം തൈകള്‍ നട്ടുപിടിപ്പിക്കും. ഇതിന്റെ ഉദ്ഘാടനം പുലിക്കുന്നില്‍ മരംവെച്ച് പിടിപ്പിച്ച് സോഷ്യല്‍ ഫോറസ്റ്റ്ട്രി ഡെപ്യൂട്ടി കണ്‍സര്‍വേറ്റര്‍ പി. ബിജു ഉദ്ഘാടനം ചെയ്തു. നാളത്തെ തലമുറക്ക് ശുദ്ധമായ വായു ശ്വസിച്ച് ജീവിക്കാനുള്ള സാഹചര്യം സൃഷ്ടിച്ചെടുക്കുക എന്ന ലക്ഷ്യത്തോടെ ’75 മേറ്റ്‌സ് എന്ന സഹപാഠി കൂട്ടായ്മ നിര്‍വഹിക്കുന്നത് ഏറ്റവും മഹത്തായദൗത്യമാണെന്നും മരങ്ങള്‍ കൊണ്ട് ഭൂമിക്ക് കുട ചൂടുക എന്നത് നന്മ നിറഞ്ഞ ഹൃദയങ്ങളില്‍ നിന്നുള്ള പ്രതിഫലനമാണെന്നും അദ്ദേഹം പറഞ്ഞു. ഫാദര്‍ മാത്യു ബേബി മുഖ്യാതിഥിയായിരുന്നു. ’75 മേറ്റ്‌സ് ഗ്രീന്‍ കാസര്‍കോട് കണ്‍വീനര്‍ കെ.എ മുഹമ്മദ് ബഷീര്‍ വോളിബോള്‍ അധ്യക്ഷത വഹിച്ചു. പ്രോഗ്രാം കമ്മിറ്റി കണ്‍വീനര്‍ എം.എ ലത്തീഫ് സ്വാഗതം പറഞ്ഞു. തളങ്കര സ്‌കൂള്‍ ഒ.എസ്.എ ജനറല്‍ സെക്രട്ടറി ടി.എ ഷാഫി, വാര്‍ഡ് കൗണ്‍സിലര്‍ സക്കീന മൊയ്തീന്‍, ’75 മേറ്റ്‌സ് ട്രഷറര്‍ എം.എ അഹ്മദ് പ്രസംഗിച്ചു. നഗരസഭാ മുന്‍ കൗണ്‍സിലര്‍ മൊയ്തീന്‍ കമ്പ്യൂട്ടര്‍, മഹമൂദ് നാലപ്പാട്, മുസ്തഫ സോള്‍ക്കര്‍, പി.എ മജീദ്, ബി.യു അബ്ദുല്ല, ടി.എ അബ്ദുല്‍ റഹ്മാന്‍ മാസ്റ്റര്‍, അബ്ദുല്‍ ഖാദര്‍ ടൈഗര്‍ ഹില്‍സ്, എരിയാല്‍ ഷെരീഫ്, ഷാഫി തെരുവത്ത്, സുബൈര്‍ പള്ളിക്കാല്‍, സുബൈര്‍ പുലിക്കുന്ന് തുടങ്ങിയവര്‍ സംബന്ധിച്ചു. പി.എം കബീര്‍ നന്ദി പറഞ്ഞു.
ആദ്യഘട്ടത്തില്‍ കാസര്‍കോട്-കാഞ്ഞങ്ങാട് കെ.എസ്.ടി.പി റോഡില്‍ ആയിരത്തിലേറെ മരങ്ങളും രണ്ടാംഘട്ടത്തില്‍ സര്‍ക്കാര്‍ ഓഫീസുകളിലും ആരാധനാലയങ്ങളിലും നൂറുകണക്കിന് മരങ്ങളും ’75 മേറ്റ്‌സ് നട്ടുപിടിപ്പിച്ചിരുന്നു.
About the Author
